كشف عبد الله السعيد، نجم الزمالك، كواليس انتقالاته بين الإسماعيلي، والأهلي، وبيراميدز، وصولًا إلى القلعة البيضاء، مؤكدًا أنه كان يسعى للانضمام للأبيض قبل الانتقال إليه ب3 سنوات.
وقال عبد الله السعيد، خلال تصريحات إعلامية: "أهلي كانوا خايفين لما روحت الأهلي من الإسماعيلي، وحصلهم مشاكل في إسماعيلية ساعتها، وطبعًا كان حقهم يتضايقوا لأن الأهلي والإسماعيلي طول عمرهم منافسين لبعض".
وأضاف: "كنت عارف إني لما أجي أمشي من الإسماعيلي هيتم مهاجمتي، ده طبيعي وهي دي الكورة، ومهما اتكلمت وبررت مش هغير حاجة".
وأوضح: "كنت حاسس ساعتها إن خطوة انتقالي للأهلي متأخرة، وفي الإسماعيلي المنافسة على البطولات وتحقيقها صعب جدًا، عشان كده كنت حاسس إن الخطوة دي هتساعدني في الوصول للمنتخب والبطولات".
وكشف السعيد كواليس انتقاله إلى بيراميدز: "وأنا في أهلي جدة جالي تليفون من المستشار تركي آل الشيخ عشان أنضم إلى بيراميدز ووافقت، تاني يوم كنت في مصر وكان فيه ماتش ضد الأهلي، واتعرفت على اللعيبة وإحنا في الأتوبيس رايحين الملعب، وقبل المحاضرة حسام حسن قالي هلاعبك في نص الملعب ديفيندر، وبعدها الشوط التاني لعبت صانع ألعاب وجبت جول المكسب".
وعن انتقاله إلى الزمالك: "قرار انتقالي للزمالك جاء بسبب تعودي على الأندية الجماهيرية والحماس، كنت بلعب في بيراميدز وماشي كويس، لكن كنت ببقى حاسس إن فيه حاجة ناقصاني".
وأضاف: "كنت بسعى إني أروح للزمالك قبل ما أنضم إليه بـ3 سنوات، لكن كانت هناك مشاكل في الزمالك والانتقالات مقفولة، وكان لسه ليا عقد مع بيراميدز، وبيراميدز عايز فلوس الزمالك مش هيقدر يدفعها".
واختتم: "خطوة انتقالي للزمالك كانت ريسك كبير، لكن أنا كنت حاسس إني عايز أخوض التحدي ده وأعمل حاجة، وجماهير الزمالك بتحب وتساعد اللاعب اللي ييجي ويدي الفريق بتاعهم، وكانوا بيحبوني من قبل ما أجي وده كان دافع، طبعًا فيه مشاكل كتير في الزمالك، وخدت بطولات في وقت صعب معاهم".
